Á síðustu 10 mánuðum hefur gjörgæslurýmum í landinu fækkað um 23,7% eða úr 406 í 310. Politiken skýrir frá þessu og byggir á skýrslu sem var gefin út af Regionernes Kliniske Kvalitetsudviklingsprogram.
Politiken hefur eftir Anders Perner, prófessor og yfirlækni á gjörgæsludeild Ríkissjúkrahússins í Kaupmannahöfn, að of fá gjörgæslurými séu í landinu og það sé mikið áhyggjuefni. Annað sé ekki um það að segja.
Fækkun gjörgæslurýma er tilkomin vegna skorts á starfsfólki og þá aðallega gjörgæsluhjúkrunarfræðinga að sögn Politiken. Samtök danskra lækna segja stöðuna mikið áhyggjuefni.
Hjúkrunarfræðingar hafa átt í kjaradeilum við hið opinbera og fóru í 10 vikna verkfall í vor. Lög voru að lokum sett á verkfallið og kjaramálin send í gerðardóm sem hefur ekki enn lokið störfum. Mikil óánægja er meðal hjúkrunarfræðinga með kjör sín og hafa margir sagt upp störfum og nú er svo komið að ekki tekst að ráða í meirihluta lausra staða hjúkrunarfræðinga.
Camilla Rathcke, formaður læknasamtakanna, sagði að allt frá því að heimsfaraldurinn brast á hafi verið rætt um hvort nægilega mörg gjörgæslurými séu í landinu en í upphafi hafi verið sagt að sú umræða verði að bíða þar til hann sé afstaðinn en nú sé ekki hægt að bíða lengur, það vanti fleiri gjörgæslurými.
