Fjögur sorpsamlög á suðvesturhorni landsins, Sorpa, Kalka, Sorpurðun Vesturlands og Sorpstöð Suðurlands, skoða nú möguleg kaup á risasorpbrennsluofni til að leysa þann mikla vanda sem steðjar að varðandi urðun sorps á svæðinu en 85% af öllu sorpi landsins fellur til á umráðasvæði sorpsamlaganna. Þetta kemur fram í forsíðufrétt Fréttablaðsins í dag.

Vaxandi kröfur eru um að draga úr urðun sorps og tíminn er af skornum skammti því heimild til urðunar sorps í Álfsnesi rennur út um áramótin 2023 en í aðdraganda þess minnkar árlega magnað sem urða má á svæðinu. Draga  mun til tíðinda um áramótin en áætlaður kostnaður við slíkan ofn, sem gæti annað brennslu á um 100 þúsund tonnum á ári, sé um 20-30 milljarðar króna. Í fréttinni er haft eftir Líf Magneudóttur, borgarfulltrúa og stjórnarformann Sorpu, að vanda þurfi vel til verka varðandi staðsetningu enda ljóst að slík starfsemi muni ekki falla öllum í geð.

Þar sem mest af sorpinu fellur til á höfuðborgarsvæðinu er ljóst að mögulegt svæði undir slíkan ofn verður í grennd við það. Þá verður staðsetningin að vera í grennd við höfn enda kæmi til greina að flytja sorp frá landinu öllu með skipum til brennslu.  Skoðað verður hvort hægt verði að nota ofninn til húshitunar.