Birkir Már Sævarsson segir að eldri og reynslumeiri leikmenn íslenska karlalandsliðsins hafi verið yngri leikmönnum innan handar er gagnrýni rigndi yfir liðið í samfélaginu í haust.
Landsliðið var í verkefni í september þegar leikmenn lentu í því að vera kallaðir nauðgarar á götum úti. Um tvö atvik var að ræða. Það fyrra á æfingu liðsins í Safamýri. Það seinna átti sér stað þegar liðið fékk sér göngutúr í Reykjavík.
Þetta kom í kjölfar umræðu um meint kynferðisbrot landsliðsmanna. Þá var Knattspyrnusamband Íslands sakað um að hylma yfir með brotunum. Guðni Bergsson sagði af sér sem formaður og öll stjórn KSÍ gerði slíkt hið sama.
,,Þetta var hundleiðinlegt. Það er enginn sem vill fá svona kallað á eftir sér. Maður tekur þetta ekkert rosa mikið inn á sig. Bara aðallega leiðinlegt að stemningin sé þessi,“ sagði Birkir Már í viðtali við Fótbolta.net.
Hann segir að eldri leikmenn hafi þurft að vera til staðar fyrir yngri leikmenn á þessum tímum.
,,Við sem eldri erum og höfum gengið í gegnum nokkur ár með landsliðinu, við þurftum að vera þeim innan handar ef þeim fannst þeir þurfa það. Ég held við höfum gert það ágætlega við gömlu karlarnir, taka utan um ungu strákanna og reyna að láta þeim líða vel inni í landsliðinu, þetta væri ekki svona rosa þrúgandi eins og alls staðar annars staðar.“
,,Það er óhætt að segja að þetta hafi verið þyngsti tíminn (með landsliðinu).“
Landsliðsþjálfarinn, Arnar Þór Viðarsson, sagði frá uppákomunni í göngutúrnum snemma í haust.
„Til að setja hlutina í samhengi, talandi um spennustig. Okkur langar að gefa ykkur eitt dæmi hvað þetta er oft erfitt fyrir þessa drengi. Að finna stuðning og búa til stuðning fyrir liðið. Þá er íslenska karlalandsliðið í göngutúr á leikdegi á heimavelli í Reykjavík og þeir þurfa að sitja undir því að kallað sé á þá nauðgarar, nauðgarar. Fjölskyldumenn og ungir drengir, þetta er erfitt.“