Ísak Bergmann Jóhannesson verður líklega í stóru hlutverki í íslenska landsliðinu í knattspyrnu um ókomna tíð. Ísak er 18 ára gamall en á fast sæti í hópnum.
Hann dregur lærdóm af þeirri brekku sem landsliðið er í núna. Hann hefur tvö persónuleg markmið en það er að verða fastamaður í byrjunarliði FCK í Danmörku og fastamaður í byrjunarliði Íslands.
„Markmiðin eru að koma mér í byrjunarliðið og vera fastamaður, næsta skref mitt er að verða lykilmaður í báðum þesusm liðum. Ég er klár í verkefnið þó það sé erfitt, sama hvort það taki eitt eða tvö ár,“ sagði Ísak á fréttamannafundi landsliðsins í gær
„Ég ætla að taka einn leik í einu og gera mitt besta núna. Persónulega markmiðið er að koma mér inn í liðið hjá landsliðinu.“
Ísak ræddi svo um erfiða tíma landsliðsins undanfarna mánuði. „Þetta er búið að vera risa brekka, maður lærir mest í þeim. Vonandi erum við komnir í betri takt. Ég finn það á vellinum að við erum að búa til betri tengingu, mér finnst hún vera að koma. Það eru margir að taka stórt skref, þetta lið mun klárlega gera góða hluti þó það taki tíma. Við verðum gott lið í framtíðinni.“
Ísland mætir Rúmeníu í undankeppni HM á morgun en síðasti leikurinn í riðlinum fer fram á sunnudag gegn Norður-Makedóníu.
