Héraðssaksóknari gaf á dögunum út ákæru gegn karlmanni fyrir að hafa í tvö skipti veitt ólögráða barni áfengi í skiptum fyrir munnmök og samræði.
Brotin eru sögð hafa átt sér stað í byrjun janúar þessa árs. Í fyrra skipti mun maðurinn hafa látið barninu í té áfengi og látið hana hafa við sig munnmök. Daginn eftir veitti hann, samkvæmt ákærunni, sama barni aftur áfengi, og þá haft við hana munnmök og samræði.
Ákært er fyrir brot á 202. grein almennra hegningarlaga sem leggur 1 til 16 ára fangelsi fyrir að hafa samræði eða önnur kynferðismök við barn yngra en 15 ára. Til vara er maðurinn ákærður fyrir brot gegn 204. gr. sömu laga, sem segir að hafi brot gegn áðurnefndu ákvæði verið framið „í gáleysi um aldur,“ skal beita vægari refsingu en ella. Þó skal refsingin ekki fara niður fyrir 1 ár í fangelsi.
Foreldri ólögráða barnsins krefst þess, fyrir hönd dóttur sinnar, að ákærði verði dæmdur til að greiða dóttur sinni þriggja milljóna í bætur vegna athæfisins, auk vaxta. Þá krefst saksóknari þess að maðurinn verði dæmdur til refsingar og til greiðslu alls sakarkostnaðar.
