Fjórir ökumenn til viðbótar voru handteknir í gærkvöldi og nótt grunaðir um að vera undir áhrifum áfengis og/eða fíkniefna. Tveir þeirra reyndust vera sviptir ökuréttindum og einn án ökuréttinda.
Einn var kærður fyrir akstur á móti rauðu ljósi í Háaleitis- og Bústaðahverfi síðdegis í gær. ökumaðurinn neitaði sök en myndbandsupptaka er til af meintu broti hans.
Síðdegis í gær var maður staðinn að þjófnaði úr verslun í Hafnarfirði. Hann hafði komið vörunum fyrir í bifreið vinar síns sem sagðist ekki hafa vitað að þær voru illa fengnar. Vörunum var skilað og skýrsla skrifuð um málið.
Á áttunda tímanum var tilkynnt um þjófnað úr verslun í Kópavogi. Þar hafði maður verið stöðvaður þegar hann yfirgaf verslunina með 20 stykki af 500 gr. smjöri eða samtals 10 kíló. Hann hafði sett smjörið í bakpoka sinn. Verðmæti þeirra er 11.920 krónur.
Klukkan fjögur í nótt var ofurölvi maður handtekinn í verslun í Hlíðahverfi. Hann er grunaður um þjófnað en hann var búinn að taka vörur og stinga inn á sig. Hann var vistaður í fangageymslu.
Í Grafarvogi var ofurölvi maður handtekinn á veitingastað á áttunda tímanum. Hann var ógnandi og fór inn í eldhús staðarins. Hann var vistaður í fangageymslu.