Ágúst Gylfason þjálfari Stjörnunnar var ekki lengi að taka upp símann og reyna að klófesta Thomas Mikkelsen fyrrum framherja Breiðabliks. Þetta herma heimildir 433.is.
Ágúst tók við Stjörnunni á dögunum en hann og Mikkelsen áttu frábært samstarf hjá Breiðabliki. Samkvæmt heimildum 433.is hringdi Ágúst í Mikkelsen á dögunum.
Mikkelsen yfirgaf Breiðablik um mitt sumar af persónulegum ástæðum, flutti hann heim til Danmerkur og er ánægður með lífið þar.
Mikkelsen er ekki á þeim buxunum að snúa aftur til Íslands og mun því ekki ganga til viðræðna við Stjörnuna. Samkvæmt heimildum 433.is.
Mikkelsen samdi við Kolding í heimalandinu en hann hafði slegið í gegn í Kópavoginum og raðað inn mörkum. „Ég elska þau og ég mun aldrei spila fyrir neitt annað lið á Íslandi. Þetta er mitt lið og ég mun styðja þau heiman frá,“ sagði Mikkelsen þegar hann yfirgaf Breiðablik í ágúst.
