Á áttunda tímanum í gærkvöldi var maður handtekinn í Laugardal. Hann var ölvaður og hafði verið að áreita börn og hrækja að þeim. Hann hrækti á lögreglumann og neitaði að skýra frá nafni og öðrum persónuupplýsingum. Hann var vistaður í fangageymslu.

Í Bústaða- og Háaleitishverfi voru þrír handteknir á sjötta tímanum í gær grunaðir um vörslu fíkniefna. Allir voru vistaðir í fangageymslu.

Klukkan 20 var maður handtekinn í Hafnarfirði grunaður um vörslu/sölu fíkniefna. Hann var vistaður í fangageymslu.

Á sjöunda tímanum tilkynnti maður að hann hefði orðið fyrir líkamsárás af hendi fjögurra manna í Miðborginni en hafi hann náð að hlaupa frá þeim. Hann var í miklu uppnámi og rispaður á olnboga og mjöðm. Málið er í rannsókn.

Á fimmta tímanum í nótt var tilkynnt um innbrot í lyfjaverslun í Hlíðahverfi. Málið er í rannsókn.

Á tólfta tímanum varð rafskútuslys í Garðabæ. Ungur maður datt af rafskútu og hlaut áverka í andlit, skurð á höku og það blæddi úr honum. Hann var fluttur með sjúkrabifreið á bráðadeild. Hann er grunaður um ölvun.

Í Kópavogi var tilkynnt um eld í blaðagámi á tíunda tímanum. Tilkynnandi slökkti eldinn með garðslöngu.

Á tólfta tímanum fipaðist 17 ára ökumanni þegar hann var að taka framúr bifreið á Bláfjallavegi og endaði bifreið hans utan vegar.. Tveir farþegar voru í bifreið hans. Ökumaðurinn fann til eymsla í hendi og annar farþeginn fann til í baki, höfði og olnboga. Þeir voru fluttir með sjúkrabifreið á bráðadeild.

Einn ökumaður var handtekinn í gærkvöldi í Hafnarfirði grunaður um að vera undir áhrifum fíkniefna.