Anthony Elanga, leikmaður Manchester United og sænska undir 21 árs landsliðsins varð fyrir kynþáttaníði frá andstæðingi sínum í ítalska undir 21 árs landsliðinu í gær. Ekki er greint frá því um hvaða leikmann í ítalska liðinu ræðir.
Sænska knattspyrnusambandið hefur sent frá sér tilkynningu þar sem að segir að Elanga hafa tilkynnt atvikið eftir leik.
„Við höfum sagt frá okkar upplifun af atvikinu og skilað inn bæði munnlegri og skriflegri skýrslu til dómara leiksins og eftirlitsmanna á vellinum,“ greindi Claes Eriksson, þjálfari undir 21 árs landsliðs Svíþjóðar frá.
Leiknum lauk með 1-1 jafntefli en jöfnunarmark Svíþjóðar kom á lokamínútum leiksins.
„Enginn ætti að þurfa upplifa kynþáttaníð, þetta er óásættanlegt og við stöndum þétt við bakið á Anthony í gegnum þetta,“ sagði Eriksson.
Anthony Elanga spilaði sinn fyrsta leik fyrir aðallið Manchester United á síðasta tímabili og hefur komið við sögu í einum leik á þessum tímabili.