Bæjarstjórn Hafnarfjarðar heimilaði á fundi sínum gær að  gefa nýfæddum Hafnfirðingum á næsta ári sérstaka gjöf frá bænum. Áætlanir gera ráð fyrir að um 350 nýburar og fjölskyldur þeirra muni fá gjöfina á næsta ári og er gert ráð fyrir að kostnaðurinn nemi um 5 milljónum króna. Talsmenn minnihlutans í Hafnarfirði studdu ekki tillöguna og létu færa til bókar að um sóun á skattfé væri að ræða.

Á fundi bæjarstjórnar í gær var verkefnið kynnt fyrir bæjarstjórn. Þar kemur fram að gjöfin muni kallast Krúttkarfan og muni innihalda nokkrar gjafir til nýbura og fjölskyldna þeirra.

Mun karfan innihalda fatnað frá MÓI (heilgalla, húfu, smekk og sokka að verðmæti 7.976 krónur), tvær barnabækur frá Forlaginu (að verðmæti 3.793 krónur)  og krúttbangsa frá Skjaldbökunnu (að verðmæti 1.590 krónur). Við þetta bætist umbúðargjald (490 krónur), póstkort (290 krónur) og skilaboð og heilræði (650 krónur).

Í heildina mun því Krúttkarfan kosta 14.789 krónur og heildarverðið verður því um 5,2 milljónir króna. Þá kemur fram að nýbakaðir foreldrar muni fá gjöfina afhenda á Bókasafni Hafnarfjarðar og verður verkefnuð reglulega kynnt á samfélagsmiðlum bæjarins.

Í fundargerð bæjarstjórnar kemur fram að málið sé eitt af kosningarloforðum Framsóknarflokksins og að fulltrúar minnihluta Samfylkingar, Viðreisnar og Miðflokks þyki lítið til þess koma. Fulltrúarnir létu bóka að þau myndu ekki styðja afgreiðslu málsins.

„Markmið verkefnisins eru óljós og undirrituð telja að hægt væri að nýta fjármuni bæjarbúa mun betur og með skilvirkari hætti í þágu barnafjölskyldna í bænum,“ segir í bókun minnihlutans.

Eini bæjarfulltrúi Framsóknarflokksins er hinn nýkjörni þingmaður Ágúst Bjarni Garðarsson, sem jafnframt er formaður bæjarráðs Hafnarfjarðar. Kemur fram í áðurnefndri fundargerð að hann hafi verið í forsvari fyrir afgreiðslu málsins og veitt ítrekuð andsvör við mótbárum fulltrúa minnihlutans.