Arnar Gunnlaugsson, þjálfari Víkings, var eðlilega glaður í viðtali við Stöð 2 Sport eftir leik gegn Leikni í dag. Víkingur vann leikinn og er þar með orðið Íslandsmeistari í fyrsta sinn í 30 ár.

,,Þetta var magnaður fyrri hálfleikur. Um leið og við komum til leiks voru allir fókuseraðir. Seinni hálfleikurinn fer seint í sögubækurnar fyrir fegurð. Frábær varnarleikur í seinni hálfleik líka og þeir fengu varla færi,“ sagði Arnar eftir leik.

Víkingar fóru með 2-0 forystu inn í hálfleik. Arnar segir að liðið hafi þurft að koma saman inni í klefa og róa sig aðeins.

,,Það var magnþrungið tilfinningamóment inni í klefa í hálfleik. Við þurftum aðeins að róa okkur niður og klára málið.“

,,Þetta er búið að vera geggjaður hópur og við fundum það fyrir leikinn, stemmningin og einbeitingin, Fyrsta flokks frammistaða frá A-Ö.“

,,Þetta er búið að vera ótrúlegt sumar. Við erum ekki bara búnir að vinna hug og hjörtu Víkinga heldur allra landsmanna.“