Samkvæmt frétt Fótbolta.net í kvöld er Hermann Hreiðarsson líklegastur til að verða næsti þjálfari karlaliðs ÍBV.
Starfið er laust eftir að Helgi Sigurðsson sagði því upp í lok tímabils. Hann hafði þá komið ÍBV aftur upp í deild þeirra bestu eftir tveggja ára veru í Lengjudeildinni.
Hermann er sem stendur þjálfari Þróttar Vogum. Undir hans stjórn komst liðið upp úr 2. deild og í Lengjudeildina á dögunum.
Hermann var spilandi þjálfari ÍBV í efstu deild árið 2013. Auk þess hefur hann þjálfað bæði karla -og kvennalið Fylkis á ferlinum. Þá hefur Hermann starfað sem aðstoðarstjóri hjá Southend United á Englandi og Kerala Blasters á Indlandi.
Sem knattspyrnumaður lék Hermann 89 A-landsleiki fyrir Íslands hönd. Þá lék hann fyrir félög á borð við Portsmouth, Charlton og Crystal Palace, svo eitthvað sé nefnt.
