Gordon Neil Ramsay var nýlega ráðinn dósent í fjölmiðlafræði við Félagsvísindadeild Háskólans á Akureyri. Þetta kemur fram í tilkynningu sem birt var á innri vef háskólans í gær en annar dósent í skólanum, Birgir Guðmundsson, vekur athygli á ráðningu Ramsay í færslu sem hann birti á Facebook-hópnum Fjölmiðlanördar.

Nafn Gordon Ramsay hringir eflaust einhverjum bjöllum hjá aðdáendum raunveruleikasjónvarpskokkaþátta en þessi Gordon er ekki sá sami og hefur skemmt áhorfendum með reiði sinni og eldamennskutöfrum. Þessi Ramsay virðist þó vera jafn fær í fjölmiðlum og nafni hans er í eldamennskunni ef marka má afrek hans í bransanum.

„Ný rödd í íslenskri fjölmiðlaumræðu!“ segir Birgir í færslunni sem hann birti en rödd Ramsay er langt frá því að vera reynslulaus þegar kemur að fjölmiðlum, ferilskrá hans er ansi stórfengleg. „Hann hefur meira en 10 ára reynslu af kennslu og rannsóknum á sviði stefnumótunar fyrir fjölmiðla,“ segir til að mynda í tilkynningunni um ráðningu hans.

Þá kemur einnig fram að hann hafi til dæmis rannsakað breytingar á hlutverki fjölmiðla í kosningum en eftir það gekk hann til liðs við ráðgjafafyrirtækið Media Standars Trust. „Þar vann hann að rannsóknum og gerð stefnumótunartillagna varðandi sjálfseftirlit breskra fjölmiðla.

Árið 2015 stofnaði Ramsay ásamt fleirum Study of Media, Communication and Power, rannsóknarmiðstöð í fjölmiðlum við Kings College í London. Síðustu ár hefur hann til að mynda starfað við háskólana í Westminister og Goldsmith’s College en auk þess hefur hann verið ráðgjafi stjórnvalda í Bretlandi og í Singapore.

„Rannsóknir hans eru á sviði blaðamennsku og lýðræðis, hnignun staðbundinna frétta, og upp á síðkastið hefur hann skrifað um þá hættu sem blaðamennsku og borgurum stafar af upplýsingamengun,“ segir að lokum um Ramsay í tilkynningunni.