Héraðssaksóknari hefur ákært rúmlega tvítugan karlmann fyrir kynferðisbrot sem sagt er hafa verið framið innan Fjölsmiðjunnar á Akureyri. Fjölsmiðjan er vinnusetur fyrir ungt fólk á krossgötum í lífinu, að því er segir á heimasíðu hennar.
Samkvæmt ákærunni, sem DV hefur undir höndum, mun maðurinn hafa ítrekað áreitt skjólstæðing Fjölsmiðjunnar kynferðislega, er hún var aðeins 16 ára, með því að grípa utan um hana og strjúka henni utanklæða. Brotin áttu sér stað tvo daga í röð haustið 2019.
Maðurinn var starfsmaður Fjölsmiðjunnar er brotin áttu sér stað en lét af störfum skömmu eftir brotin.
Í samtali við DV sagðist Erlingur Kristjánsson, forstöðumaður Fjölsmiðjunnar, vera meðvitaður um málið, en hann gat ekki tjáð sig um það að öðru leyti. Vildi hann þá jafnframt ekki staðfesta að manninum hafi verið sagt upp vegna hinna meintu kynferðisbrota, enda væri málið enn til meðferðar í réttarkerfinu.
Héraðssaksóknari krefst þess að manninum verði gert að sæta refsingu og greiðslu alls sakarkostnaðar. Þá gerir faðir brotaþola fyrir hönd ólögráða dóttur sinnar kröfu um að maðurinn greiði henni 600 þúsund krónur í miskabætur auk þóknunar réttargæslumanns.
Málið verður þingfest í Héraðsdómi Norðurlands eystra á Akureyri þann 16. september næstkomandi.
