Stjórn KSÍ hefur fundað stíft um helgina, bæði í dag og gær. Klukkan 16 í dag voru síðan allir starfsmenn KSÍ boðaðir á fund í höfuðstöðvum KSÍ í Laugardal. Við upphaf starfsmannafundarins gaf KSÍ út stutta tilkynningu þess efnis að Guðni Bergsson, formaður KSÍ, hefði sagt af sér formennsku. Afsögnin er, sem kunnugt er, í skugga ásakana um kynferðisbrot og önnur ofbeldisbrot nokkurra landsliðsmanna í knattspyrnu. Meginástæðan fyrir afsögn Guðna er sú að hann fór rangt með í sjónvarpsviðtali er hann staðhæfði að KSÍ hefði ekki borist tilkynning um kynferðisbrot landsliðsmanna.

Klara Bjartmarz, framkvæmdastjóri KSÍ, ræddi við Vísir.is eftir langan starfsmannafund KSÍ. Stjórn KSÍ hefur fundað alla helgina og sagði Klara að málið væri vandasamt og þess vegna tækju fundahöld langan tíma.

Stjórn KSÍ situr áfram, en óvíst hvað lengi. Hún fundar enn frekar vegna yfirlýsingar frá KSÍ sem er í smíðum.

„Þolendur eiga von á afsökunarbeiðni frá KSÍ. Þeir sem hafa lagt sitt af mörkum við að vekja athygli á þessum málum verða einnig beðnir afsökunar,“ sagði Klara í viðtali við Vísir.is.

„Við gerðum þetta ekki nógu vel. Við áttum að gera betur,“ sagði Klara. Hún segir að KSÍ kunni knattspyrnu en kunni ekki að fara með mál af þessu tagi, þ.e. kynferðisbrot. Þess vegna hafi KSÍ í dag leitað ráðgjafar hjá fólki sem þekkir til þessara mála, meðal annars hefur verið fundað með Hönnu Björgu Vilhjálmsdóttur, framhaldsskólakennara og formanni jafnréttisnefndar Kennarasambands Íslands, sem og fulltrúa frá Stígamótum.

„Umbótaferli er hafið,“ sagði Klara og lagði áherslu á að sú vinna yrði í höndum óháðra fagaðila.

KSÍ hefur sent frá sér yfirlýsingu – sjá hér