Pep Guardiola sagði á blaðamannafundi fyrir leikinn gegn Arsenal á laugardaginn að Man City ætti ekki 200 milljónir punda til ráðstöfunar.
Aðspurður hvort hann væri svekktur yfir því að City hafi ekki tekist að fá Harry Kane, framherja Tottenham, í sínar raðir sagði Spánverjinn að félagið hefði aldrei verið í samningaviðræðum við Kane.
„Nei, nei nei. Félagið gerði allt sem það gat. Tottenham vildi ekki tala við okkur. Það var ekkert tilboð á borðinu,“ sagði Guardiola. „Þegar að félag vill ekki semja, þá er ekkert til að tala um. Kannski segja þeir að þeir vilji fá 200 milljónir punda fyrir Harry Kane. Við erum ekki að fara að borga 200 milljónir punda. Við eigum það ekki til.
Við reyndum að hefja viðræður við hann en meistari samningaviðræðna, hann Daniel Levy veit allt svo við gátum ekkert gert. Kannski myndi ég gera slíkt hið sama í hans sporum.“
Hann sagði jafnframt að fáir leikmenn í heiminum ráða sjálfir hvaða félög þeir spila fyrir en að Cristiano Ronaldo og Lionel Messi væru á meðal þeirra. Þetta var áður en að kom í ljós að Ronaldo hefði samið við Manchester United, en allt leit út fyrir að Portúgalinn væri á leiðinni til nágrannanna í Man City.
„Cristiano ræður sjálfur hvar hann spilar. Ekki Manchester City og ekki ég.“
