Leikmenn, þjálfarar og stuðningsmenn ÍA eru þekktir fyrir það að láta vel í sér heyra á meðan leikjum stendur. Lítið hefur gengið upp hjá liðinu í Pepsi Max-deild karla á þessari leiktíð, Skagamenn eru í bullandi fallbaráttu. Í sjónvarpsþættinum 433.is á Hringbraut í gærkvöldi velti Benedikt Bóas Hinriksson því upp hvort að hegðun Skagamanna gæti hafa komið í bakið á þeim í sumar.

,,Þegar þeir reyna að einbeita sér að fótbolta þá finnst mér Skagamenn fínir. Þeir eru bara að einbeita sér að einhverjum mjög furðulegum hlutum. Ég held að vegferðin sem þeir eru á, árásagirni á bekknum og annað, það er bara að koma þeim í koll. Það nennir enginn að hafa þá í efstu deild, bara drullið ykkur niður. Að vera á leikjum uppi á Skaga, ertu að grínast? Núna í ár, þegar þeir koma á aðra velli, þetta er svo hallærislegt,“ sagði Benedikt.

,,Þetta missir marks síns þegar þeir gera þetta í hverjum einasta leik. Það er augljóst að ekki allir eru á móti Skagamönnum,“ bætti Hörður Snævar Jónsson við.

ÍA er í neðsta sæti Pepsi Max-deildarinnar með 12 stig. Liðið er 4 stigum frá Fylki sem er í síðasta örugga sætinu. Skagamenn eiga þó leik til góða.

Hér fyrir neðan má sjá umræðuna um ÍA, sem og sjónvarpsþátt 433.is í heild sinni.