Samkvæmt öruggum heimildum DV hefur rúmenskur maður, Razvan Nicolas, sem varð Daníel Eiríkssyni að bana þann 2. apríl síðastliðinn, verið handtekinn.
Daníel Eiríksson fannst illa leikinn á jörðinni fyrir utan heimili sitt í Kópavogi, aðeins tveimur klukkustundum áður en hann átti að mæta í viðtal hjá ráðgjafa í aðdraganda innlagnar inn á meðferðarheimilið Vog. Daginn eftir, þann 3. apríl, var Daníel úrskurðaður látinn á sjúkrahúsi.
Í kjölfarið voru þrír rúmenskir karlmenn handteknir en tveimur var sleppt úr haldi. Razvan Nicolas var þá einn grunaður í málinu en hann er talinn hafa ekið á Daníel. Razvan ber því við að um slys hafi verið að ræða, Daníel hafi hangið utan á bílnum og fallið í jörðina þegar maðurinn ók burtu. Líkt og DV hefur greint frá leggja ástvinir Daníels lítinn trúnað á þá frásögn.
Razvan rauf farbann fyrir skömmu og fór úr landi á fölskum skilríkjum. Þegar síðast var vitað stóð til stefndi lögregla að því að fá útgefna á hann alþjóðlega handtökuskipun. Lögregla gaf DV ennfremur þær upplýsingar hún að ætti von á að hafa hendur í hári mannsins.
Razvan hefur farið mikinn á samfélagsmiðlum eftir að hann flúði úr landi og meðal annars sýnt seðlabúnt og skartgripi og stært sig af lífsstíl sínum. Fjölskylda Daníels heitins staðhæfir að Razvan hafi aflað sér fjármuna með fíkniefnasölu.
Ekki hefur fengist staðfest hvar Razvan var handtekinn en það var að öllum líkindum í Rúmeníu. Ekki náðist í Margeir Sveinsson hjá Miðlægri rannsóknardeild lögreglunnar á höfuðborgarsvæðinu við vinnslu fréttarinnar, en hann hefur svarað fyrir málið fyrir hönd lögreglunnar.
