Átta ára stelpa var að leika sér ásamt vinkonum sínum í Gufunesbæ á fimmtudagskvöld þegar hún varð fyrir árás drengja á táningsaldri sem voru vopnaðir straumbyssu. Frá þessu greinir móðir stúlkunnar, Silja Pálsdóttir, í Facebook-hópi fyrir Grafarvogsbúa, en dóttir hennar var skotin í lærið með byssunni.

Færslan er eftirfarandi:

„Í kvöld var 8 ára dóttir mín ásamt vinkonum að leika sér í Gufunesbæ. Sem ætti að vera ágætlega öruggt útivistarsvæði fyrir börn að leika sér á, ekki satt? Nema það að þarna voru unglingsstrákar í 9. bekk með straumbyssu að hræða 8 ára börn og yngri. Dóttir mín var svo skotin í lærið með byssunni. Strákarnir voru á vespum og héldu áfram að hræða þær með því að elta þær. Þær drifu sig á hlaupahjólum heim til vinkonu dóttur minnar og voru dauðhræddar þegar heim var komið. Foreldrar stráka í 9. bekk. Endilega ræðið við drengina ykkar.“

Í samtali við DV tekur Silja fram að í lagi sé með dóttur sína, en er þó ansi ósátt með að þarna hafi leiksvæði sem stúlkurnar hafi upplifað sem öruggan stað verið eyðilagt í hugum þeirra. „Einhverjar stelpur tóku fram að þær langi aldrei aftur að fara í Gufunesbæ að leika, þar sem þær vilja aldrei aftur verða svona hræddar. Þarna voru þessir drengir að eyðileggja það sem stelpurnar litu á sem öruggt leiksvæði í sínu nærumhverfi.“

Líkt og kom fram í færslu Silju biður hún foreldra drengja í níunda bekk að ræða við börnin sín. Hún segist vera búin að fá margar ábendingar um hvaða hópur sé þarna á ferð, margir í hverfinu kannist við þessa drengi. „Ég fékk margar ábendingar og þetta virðist vera sami hópur af strákum sem eru greinilega stjórnlausir. Margir í hverfinu sem kannast við þá.“

Þá upplýsir hún DV um að hún ætli að tilkynna málið til lögreglu á mánudag. „Það þarf að grípa inn í strax svo börnunum finnist þau vera örugg í sínu hverfi. Þessir strákar átta sig kannski ekki á alvarleika málsins,“ segir Silja.