Fréttablaðið skýrir frá þessu í dag. Fram kemur að markmiðið með verkefninu sé að nútímavæða og uppfæra rannsóknaraðferðir í kringum kæfisvefn. „Staðreyndin er sú að sé fólk með kæfisvefn þá eru auknar líkur á ýmsum öðrum sjúkdómum, eins og hjartasjúkdómum og háþrýstingi ásamt oft mikilli dagsyfju,“ er haft eftir Ernu.
Hún sagði mikilvægt að rannsaka svefngæði fólks til að komast að því hvort hægt er að bæta þau með einföldum lífsstílsbreytingum eða hvort fólk þurfi að fá frekari þjónustu í heilbrigðiskerfinu. „Sé mikill hluti fólks vansvefta þá hefur það ekki bara áhrif á lífsgæði fólks heldur líka efnahagsleg áhrif, bæði á einstaklinga sem og á samfélagið,“ sagði hún.
Nú er leitað að fólki til að taka þátt í rannsókninni en þátttakendur sofa heima hjá sér í eina nótt með svefnmælibúnað sem mælir öndun, heilarit, augnhreyfingar og fleira til að mæla svefnstig, þar á meðal magn djúpsvefn og draumsvefn. Lára Jónasdóttir, verkefnisstjóri, sagði að verkefnið fari vel af stað og verið sé að leita að fleiri þátttakendum í rannsóknina. „ Við erum að leita að alls konar fólki, bæði einstaklingum sem sofa vel og þeim sem hafa upplifað einhver vandamál tengd svefni, til dæmis þeim sem hefur verið sagt að þau hrjóti og hætti að anda í svefni eða eiga erfitt með svefn. Þeir sem gefa okkur tíma sinn með því að sofa með mælibúnað, fá svo að nokkrum vikum liðnum ítarlega greiningu á svefni sínum,“ er haft eftir henni.
