Hlaðvarpsþátturinn Eldur og brennisteinn mun ekki halda áfram göngu sinni eftir ummæli sem þáttarstjórnendur hans, Snæbjörn Brynjarsson og Heiðar Sumarliðason, létu falla í þætti í vikunni. Þar fjölluðu þeir um kynferðisbrot og nauðgunarmenningu í sambandi við Þjóðhátíð í Vestmannaeyjum, og létu til að mynda hafa eftir sér að Herjólfsdalur væri nauðgaradalur.

Ákvörðun þeirra var tilkynnt í færslu á Facebook-síðu þáttarins fyrir skömmu. Þar kemur fram að það hafi verið þeir Snæbjörn og Heiðar sem tóku ákvörðunina. Jafnframt ítreka þeir afsökunarbeiðni sína.

„Eftir að hafa rætt við fólk í Vestmannaeyjum, heyrt upplifun þeirra og farið yfir framgöngu okkar í þættinum langar okkur að ítreka afsökunarbeiðni okkar. Við fórum gjörsamlega yfir strikið og við skömmumst okkar fyrir framgöngu okkar í þættinum. Við viljum biðja alla íbúa Vestmannaeyja auðmjúklega afsökunar.

Við höfum ákveðið að láta staðar numið með Eld og brennistein. Við erum einlæglega leiðir yfir þessu og vonsviknir með eigin framgöngu. Við vonum innilega að Vestmanneyingar sjái að okkur þyki þetta í raunverulega leitt og að við viljum axla ábyrgð á þessum mistökum okkar.“

DV fjallaði um málið í gær í kjölfar þess að Svava Grétarsdóttir, íþróttafréttakona Stöðvar 2, gagnrýndi þá Snæbjörn og Heiðar á Twitter. Í kjölfarið sendu þeir frá sér yfirlýsingu með afsökunarbeiðni, þar sem þeir settu jafnframt út á fréttaflutning DV, en þeim fannst samhengi ummælanna ekki koma nægilega skýrt fram.

Sjá einnig: Sögðu Eyjamenn nauðga líkt og það væri íþrótt – „Þeir þurfa að svara fyrir þessi orð“

Sjá einnig: Heiðar og Snæbjörn biðjast afsökunar

Ummælin sem voru sérstaklega gagnrýnd komu í kjölfar lesturs á textabroti þar sem nauðganir í Vestmannaeyjum voru dásamaðar, þá sögðu þeir:

„Það er eins og þetta sé einhver íþrótt innfæddra að nauðga konum sem koma frá meginlandinu.“