Tryggvi Már Sæmundsson, ritstjóri og útflutningsstjóri, hefur hrundið af stað undirskriftasöfnun undir áskorun á þjóðhátíðarnefnd Vestmannaeyja um að nefndin dragi til baka þá ákvörðun að afbóka tónlistarmanninn Ingólf Þórarinsson, Ingó Veðurguð, sem stjórnanda brekkusöngsins á þjóðhátíðinni í sumar.
Yfirlýsing um málið er birt á eyjar.net og þar er jafnframt tengill inn á síðu undirskriftarsöfnunarinnar. Í tilkynningunni segir:
„Í gær tilkynnti þjóðhátíðarnefnd að Ingólfur Þórarinsson kæmi ekki fram á Þjóðhátíð í ár. Með fylgdi texti um að þessi ákvörðun nefndarinnar svaraði fyrir sig sjálf og yrði ekki rædd frekar af hennar hálfu.
Ekkert nýtt hafði komið fram í umræðunni um málið milli þess að Ingó var tilkynntur til leiks þar til að nefndin bognaði og tilkynnti um afbókun listamannsins.
Engin meint fórnarlömb hafa stigið fram. Meira að segja öfgahópurinn segist ekki hafa nafngreint neinn. Hvorki meinta þolendur né meintan geranda.
Kjarni málsins er þessi: Það er ótækt með öllu að dómstóll götunnar stjórni því hverjir komi fram á viðburðum á Íslandi. Engin kæra liggur fyrir og því er engin rannsókn í gangi af hálfu lögreglunnar.
Því er það mikilvægt að landsmenn aðstoði þjóðhátíðarnefnd ÍBV að endurskoða þá ákvörðun um að afbóka Ingó á Þjóðhátíð. Það er gert með því að skrifa undir undirskriftarlista sem aðgengilegur er hér.“
Þegar þessi frétt var skrifuð var liðin klukkustund síðan undirskriftarlistinn var settur upp og höfðu 50 skrifað undir. Sjá nánar hér.
