Á sjöunda tímanum í gærkvöldi var tilkynnt um innbrot í fyrirtæki í Árbæ. Þjófarnir tóku lykla að bifreið sem stóð fyrir utan og óku á brott á henni. Á svipuðum tíma var tilkynnt um rásandi aksturslag bifreiðar í Vogahverfi. Skömmu síðar var tilkynnt að bifreiðinni hefði verið ekið á ljósastaur. Tveir menn voru í bifreiðinni og voru þeir báðir í annarlegu ástandi. Þeir vildu ekki kannast við að hafa ekið bifreiðinni. Þeir voru handteknir og vistaðir í fangageymslu.

Á níunda tímanum í gærkvöldi bað íbúðareigandi í miðborginni um aðstoð lögreglu við að koma hústökufólki út úr íbúð hans. Fólkinu var vísað á brott.

Um klukkan hálf tíu í gærkvöldi var tilkynnt um mann sem var skorinn í andliti eftir átök í Bústaðahverfi. Meintur árásarmaður var handtekinn skömmu síðar og vistaður í fangageymslu. Um klukkan hálf tólf var tilkynnt um rafskútuslys í Bústaðahverfi.

Einn ökumaður var handtekinn í gærkvöldi grunaður um að vera undir áhrifum áfengis og fíkniefna.