Spánn og Sviss mættust í fyrsta leik 8-liða úrslita á Evrópumótinu í knattspyrnu. Þar hafði Spánn betur eftir framlengdan leik og vítaspyrnukeppni.
Spánverjar stjórnuðu leiknum eins og búast mátti við og sóttu stíft en Sviss fékk margar hornspyrnur og náði að ógna úr þeim. Spánverjar komust yfir á 8 mínútu þegar Zakaria varð fyrir því óláni að skora sjálfsmark. Þannig stóðu leikar í hálfleik.
Shaqiri jafnaði metin á 68. mínútu eftir sendingu frá Freuler en áður hafði verið misskilningur í spænsku vörninni. Freuler fékk rautt spjald stuttu síðar og var sendur í sturtu og kláruðu Sviss leikinn því manni færri. Ekki komu fleiri mörk í venjulegum leiktíma og því var gripið til framlengingar.
Þar sóttu Spánverjar stíft en Yann Sommer var frábær í markinu en hann varði 10 bolta í leiknum. Þá tók við vítaspyrnukeppni en þar voru fimm vítaklúður. Sergio Busquets og Rodri klúðruðu fyrir Spánverja en Fabian Schar, Akanji og Vargas fyrir Sviss. Spánverjar skoruðu úr þremur vítum en Sviss aðeins eitt og Spánn er því komið áfram í undanúrslit.
Sviss 1 – 1 Spánn (1-3 eftir vítaspyrnukeppni)
0-1 Zakaria sjálfsmark (´8)
1-1 Shaqiri (´68)
Freuler rautt spjald (´77)
