Um klukkan 22 var maður handtekinn í austurborginni en hann er grunaður um rán. Hann var látinn laus að skýrslutöku lokinni. Ekið var á stúlku, sem var á reiðhjóli, á áttunda tímanum í gærkvöldi. Hún var flutt á bráðadeild til skoðunar en talið er að um minniháttar meiðsl hafi verið að ræða.

Þrír voru handteknir í nótt grunaðir um að vera undir áhrifum áfengis og/eða fíkniefna.

Á áttunda tímanum í gærkvöldi var ekið á ljósastaur í austurborginni. Engin alvarleg slys hlutust af.

Á níunda tímanum í gærkvöldi var maður handtekinn í austurborginni grunaður um fíkniefnamisferli. Hann var látinn laus að skýrslutöku lokinni.

Um klukkan tvö í nótt var maður handtekinn í austurborginni vegna gruns um brot á vopnalögum. hann var vistaður í fangageymslu.

Skömmu fyrir klukkan fimm í nótt var tilkynnt um innbrot í bílskúr í austurborginni og þjófnað á hlaupahjóli. Ekki er vitað hver var að verki.