England sló Þýskaland úr leik í 16-liða úrslitum EM 2020 í dag. Leikið var á Wembley.
Liðin héldu spilunum þétt að sér í fyrri hálfleik. Timo Werner fékk besta færi hans þegar hann slapp einn í gegn en Jordan Pickford varði vel frá honum.
Seinni hálfleikur var líka rólegur lengi vel. Á 70. mínútu kom Jack Grealish inn af bekknum og átti það eftir að breyta miklu.
England komst yfir á 75. mínútu. Þá fann Grealish Luke Shaw úti vinstra megin, hann renndi honum fyrir þar sem Raheem Sterling kom með frábært hlaup og skoraði.
Stuttu síðar fékk Thomas Muller algjört dauðafæri til að jafna leikinn. Sterling átti þá hræðilega sendingu til baka sem varð þess valdandi að Muller slapp í gegn. Þjóðverjinn skaut þó framhjá.
Harry Kane gerði út um leikinn á 86. mínútu. Hann skoraði þá með skalla eftir sendingu Grealish. Lokatölur 2-0.
Englendingar fara áfram í 8-liða úrslit. Þar mæta þeir Svíðþjóð eða Úkraínu. Þýskaland er úr leik. Þetta var síðasti leikur Joachim Low sem stjóri liðsins.
