Á þriðja tímanum í nótt var maður handtekinn á bráðadeild LSH í Fossvogi en þar hafði hann látið öllum illum látum. Hann var í annarlegu ástandi. Maðurinn var vistaður í fangageymslu. Um klukkan 23 var tilkynnt um konu sem féll þegar hún var á göngu við Flekkudalsfoss. Hún var flutt á bráðadeild LSH með þyrlu Landhelgisgæslunnar.

Í Hlíðahverfi aðstoðaði lögreglan starfsfólk hótels við að vísa tveimur gestum út en þeir voru í annarlegu ástandi og höfðu verið til vandræða.

Um klukkan 18 í gær kviknaði í bíl við Arnarnesbrú. Slökkvilið slökkti eldinn. Bifreiðin er mikið skemmd.

Á áttunda tímanum í gærkvöldi var tilkynnt um olíumengun í Hafnarfjarðarhöfn. Hafnarstarfsmenn og slökkvilið hófu strax hreinsunaraðgerðir.

Á níunda tímanum í gærkvöldi var tilkynnt um innbrot í verslun í Kópavogi. Þjófurinn fannst síðar um kvöldið sem og þýfið. Innbrotsþjófurinn, sem var í annarlegu ástandi, var vistaður í fangageymslu.

Einn ökumaður var handtekinn í nótt grunaður um ölvun við akstur.