Ný skimunarstöð fyrir Covid-19 skyndipróf hefur verið opnuð í húsnæði Aðaltorgs við Aðalgötu 60 í Reykjanesbæ, skammt frá flugstöð Leifs Eiríkssonar.
Skimunarstöðin er einkum ætluð ferðamönnum sem þurfa að vera með niðurstöðu úr nýlegu Covid-19 prófi áður en þeir halda frá Íslandi í ferðalag eða snúa aftur til heimkynna sinna. Um er að ræða svokallað Antigen próf sem skilar nákvæmri niðurstöðu á aðeins 15 mínútum. Prófið er framkvæmt með stroku í nef og niðurstaða er send með QR kóða í tölvupósti til viðkomandi um leið og hún liggur fyrir. Framvísa þarf niðurstöðu úr neikvæðu Covid-19 prófi áður en fólk heldur í flug til Bandaríkjanna og fleiri landa. Notast er við Antigen skyndipróf frá Siemens sem hafa sýnt afar mikla nákvæmni eða um 99%.
Skimunarstöðin og skyndiprófið sem er framkvæmt þar bæta þjónustu verulega við erlenda ferðamenn sem koma hingað til lands. Lengri tíma tekur að fá niðurstöðu úr hefðbundnu PCR prófi sem notast hefur verið við hér á landi auk þess sem skimunar- og greiningargeta er takmarkandi þáttur þar. Öryggismiðstöðin sér um alla framkvæmd á skimunum í nýju stöðinni í samstarfi við rannsóknarstofuna Sameind. Öryggismiðstöðin hefur tekið meginþorra hefðbundinni PCR Covid-19 strokuprófa hér á landi þannig að þekking starfsmanna á skimunum er mjög mikil. Til að mynda starfa á annað hundrað sérþjálfaðir starfsmenn Öryggismiðstöðvarinnar í flugstöðinni, m.a. við sýnatöku hjá komufarþegum.
Hægt er að bóka tíma í Covid-19 skyndipróf á www.testcovid.is.
