Maður hefur verið sakfelldur fyrir að selja þremur stúlkum, 14 og 16 ára, kannabisefni, leyfa þeim að neyta kannabisefna á heimili sínu og gefa einni stúlkunni amfetamín á heimili sínu.
Dómur var kveðinn upp í málinu í Héraðsdómi Austurlands þann 4. júní.
Þann 8. nóvember árið 2020 barst lögreglu tilkynning frá foreldrum stúlknanna þess efnis að þessi tiltekni maður hefði selt þeim kannabisefni. Lögreglan ræddi við manninn í íbúð hans, þar var stæk kannabislykt og fíkniefni fundust á staðnum. Maðurinn var handtekinn og sími hans haldlagður.
Athugun leiddi í ljós að frá tímabilinu 1. janúar 2019 til 13. nóvember 2020 höfðu hátt í 60 óskyldir einstaklingar lagt peninga inn á bankareikning hans í 124 færslum, samtals upp á tæpar tvær milljónir króna. Einnig kom í ljós að maðurinn hafði sjálfur greitt tæpar 8 milljónir af reikningnum til annarra nafngreindra einstaklinga.
Framburður vitna renndi síðan stoðum undir þær fullyrðingar að maðurinn hefði selt þeim fíkniefni, en hann neitaði því. Héraðsdómur Austurlands fann hann sekan í málinu og var hann dæmdur í fjögurra mánaða fangelsi.