Stuðningsmenn Manchester United bíða flestir og vonast eftir því að Edinson Cavani framlengi samning sinn við félagið. Samningur framherjans rennur út eftir nokkrar vikur.
Talið var að Cavani vildi fara til Suður-Ameríku í sumar en honum virðist hafa snúist hugur og stefnir allt í það að hann taki ár til viðbótar hjá United.
Cavani kom til United síðasta haust á frjálsri sölu og framherjinn hefur slegið í gegn þegar hann hefur verið leikfær.
„United á að klára samning við hann, allan daginn. Það hefur verið rætt um að United sé fínn staður til að hætta á fyrir eldri leikmenn, en það er ekki eðlilegt að setja þann stimpil á Cavani. Ég hef alltaf elskað hann og hann hefur sannað ágæti sitt með átta mörkum í síðustu sjö leikjum,“ sagði Peter Crouch um framherjann knáa.
„Að segja að hann sé kominn yfir sitt besta er bull, ég heyri fólk tala um að Harry Kane sem er 27 ára sé gamall.“
„Þú sérð hvernig Cavani hugsar um sig, hann gefur United mikið. Þeir verða að semja við hann.“
