Manchester United, sendi frá sér tilkynningu í dag til þess að útskýra hvernig mótmælendur náðu að brjóta sér leið inn á leikvang félagsins, Old Trafford í gær.

Málið er litið alvarlegum augum enda átti að fara þar fram leikur Manchester United og Liverpool í ensku úrvalsdeildinni seinna um daginn en þeim leik var síðan frestað.

Í yfirlýsingu Manchester United segir að mótmælendur hafi brotist í gegnum hindranir og fram hjá öryggisvörðum og að sumir mótmælendur hafi klifrað yfir hlið sem eru staðsett við Munich-göngin á Old Trafford.

Mótmælendur þröngvuðu sér því næst í gegnum hliðarhurð á stúkunni þar sem þeir náðu að opna hurð innanfrá á Old Trafford sem hleypti öðrum mótmælendum inn.

Einnig náði annar hópur mótmælenda að komast inn á völlinn með því að brjóta niður hurð á inngangi sem er ætlaður hreyfihömluðum.

„Meirihluti okkar stuðningsmanna fordæmir þau skemmdarverk sem voru unnin, auk ofbeldis sem starfslið félagsins, lögregla og aðrir stuðningsmenn voru beittir. Þetta er nú orðið að lögreglumáli,“ stóð í yfirlýsingu frá Manchester United.

Félagið ætlar að vinna með lögreglunni til að bera kennsl á skemmdarvarga gærdagsins.

„Það er ekki vilji félagsins að refsa friðsamlegum mótmælendum en við munum vinna með lögregluyfirvöldum til þess að bera kenns á þá sem tóku þátt í glæpsamlegu athæfi,“ stóð í yfirlýsingu Manchester United um atburði gærdagsins.