Í kvöld fór fram úrslitaleikur spænska konungsbikarsins. Þar mættust Barcelona og Athletic í fjörugum leik sem lauk með stórsigri Börsunga. Þetta er annar bikarúrslitaleikur sem Athletic tapar á tveimur vikum en bikarúrslitaleikurinn 2020 fór fram 3.apríl síðastliðinn vegna Covid-19.
Barcelona voru með öll völd á vellinum og stjórnuðu leiknum allan tímann. Markalaust var í hálfleik en Athletic vörðust vel í fyrri hálfleik. De Jong komst næst því að brjóta ísinn en skot hans fór í stöng í byrjun leiks.
Í seinni hálfleik opnuðust flóðgáttir og skoruðu Börsungar fjögur mörk á 12 mínútna kafla. Griezmann braut ísinn fyrir Barcelona eftir klukkutíma leik, De Jong tvöfaldaði svo forystuna þremur mínútum síðar. Þá var komið að sjálfum Lionel Messi sem skoraði tvö mörk á 68. og 72. mínútu og þar við sat. Börsungar vinna því konungsbikarinn á Spáni og fyrsti titill Börsunga undir stjórn Ronald Koeman staðreynd.
Athletic 0 – 4 Barcelona
0-1 Griezmann (´60)
0-2 De Jong (´63)
0-3 Messi (´68)
0-4 Messi (´72)
