Ríkisstjórnin kynnir hertar samkomutakmarkanir vegna Covid-19 á blaðamannafundi kl. 15. Fyrr í dag fundaði ríkisstjórnin um tillögur sem Þórólfur Guðnason sóttvarnalæknir lagði fram til ríkisstjórnarinnar fyrir hádegi í dag.
Fréttir af uppýsingafundinum munu birtast hér reglulega. Fréttin verður uppfærð margsinnis.
Lilja Alfreðsdóttir menntamálaráðherra, Bjarni Benediktsson fjármálaráðherra, Katrín Jakobsdóttir forsætisráðherra og Svandís Svavarsdóttir heilbrigðisráðherra eru þeir ráðherrar sem eru á fundinum.
Þórólfur Guðnason sóttvarnalæknir, Alma Möller landlæknir og Rögnvaldur Ólafsson yfirlögregluþjónn eru einnig á fundinum.
Katrín Jakobsdóttir hóf fundinn og sagðist ekki flytja neinar gleðifregnir. Hún fór yfir það að baráttan gegn Covid hér á landi hafi gengið heilt yfir mjög vel og síðustu þrír mánuðir hafi verið sérstaklega ánægjulegir. En núna eru blikur á lofti og það þarf að grípa til hertra aðgerða.
Katrín sagði að það hefði verið samróma álit á ríkisstjórnarfundi fyrr í dag að stíga núna mjög fast til jarðar og grípa til harðra aðgerða. Það muni skila okkur því að við þurfum skemmri tíma til aðgerðanna í heild. Ofuráhersla er á að hefta framgang breska afbrigðis veirunnar sem nú er farið að breiðast út hér á landi.
Svandís Svavarsdóttir heilbrigðisráðherra tók við og sagði að 10 manna samkomuhámark yrði meginreglan.
Hertar reglur taka gildi á miðnætti og gilda næstu þrjár vikur.
Aðeins börn fædd síðar en 2015 eru undanþegin takmörkununum. Skólum verður lokað en leikskólar verða opnir.
Sund og líkamsræktarstöðvar loka. Sömuleiðis leikhús, skemmtistaðir og krár. En veitingastaðir mega hafa opið til kl. 22 með hámark 20 gestum í hverju hólfi. Íþróttastarf verður bannað.
Snyrtistofur, hárstofur, nuddstofur og sambærilegir staðir verða áfram opnir.
Trú- og lífskoðunarfélög mega taka á móti 30 gestum við athafnir.
Svandís boðaði jafnframt að bólusetningar með AstraZeneca hefjist að nýju.
Bjarni Benediktsson fjármálaráðherra sagði að tíðindi dagsins væru vonbrigði en reynslan sýndi að mikilvægt væri að grípa snemma inn í. „Það styttist í að við sjáum fyrir endann á þessari baráttu að koma öllum í skjól með bóluefni,“ sagði hann.
Bjarni segir að framlengja eigi gjaldfresti og fleiri úrræði skipti máli, frestun skattgreiðslna, hlutabætur og enn þá sé hægt að sækja um greiðslu launa í sóttkví.
Björn Ingi frá Viljanum spurði hvort ráðið yrði gegn ferðalögum um páskana rétt eins og í fyrra. Þórólfur Guðnason sóttvarnalæknir hvetur fólk til að vera sem minnst á ferðinni um páskana. Það sé hins vegar eftir að útfæra leiðbeiningar um þetta.
Björn Ingi hafði orð á hægagangi í bólusetningum og spurði hvort ekki væri nýrra tíðinda að vænda í þeim efnum. Svandís heilbrigðisráðherra svaraði því til að áætlunin gerði ráð fyrir að búið yrði að bólusetja þjóðina í lok júlí. Sú áætlun væri samt með fyrirvörum. Svandís segist deila óþolinmæðinni með hversu erfiðlega gangi að fá nákvæmar dagsetningar á komur bóluefna. „Það eru ýmsir möguleikar sem geta opnast og við eltum hvern þráð.“
Almennar fjöldatakmarkanir ná til allra nema þeirra sem eru fæddir 2014 eða síðar. Rangt fæðingarár var áður gefið upp um þetta, þ.e. 2015.
