Skömmu fyrir miðnætti var tilkynnt um mann með vasaljós uppi á þaki húss í miðborginni. Lögreglumenn könnuðu málið og hittu á manninn sem reyndist vera íbúi í húsinu. Hann hafði brugðið sér upp á þak til að reyna að sjá eldgosið í Geldingadal og þar með var skýring komin á málinu.

Á miðnætti var óskað eftir aðstoð að veitingastað í Grafarvogi. Þar hafði maður brugðið sér á salernið en þegar hann kom þaðan út voru allir starfsmenn farnir og búið að læsa. Öryggiskerfi fór í gang þegar maðurinn kom út af salerninu. Ekki fylgir sögunni hversu lengi hann var á salerninu.

Þrír ökumenn voru handteknir í gærkvöldi og nótt grunaðir um að vera undir áhrifum áfengis og/eða fíkniefna.

Einn ökumaður var kærður fyrir að aka bifreið með röngu skráningarnúmeri. Aðeins ein númeraplata var á bifreiðinni. Ökumaðurinn viðurkenndi brotið og sagðist hafa þurft að færa bifreiðina.

Lögreglan hafði afskipti af tveimur búðarhnuplsmálum í nótt. Annað var í Breiðholti og hitt í Kópavogi.