Á ellefta tímanum í gærkvöldi var tilkynnt um líkamsárás í Garðabæ. Hópur manna réðst á tvo menn og veitti þeim áverka. Fimm voru handteknir á vettvangi grunaðir um árásina. Þeir voru vistaðir í fangageymslu. Árásarþolarnir voru fluttir með sjúkrabifreið á bráðadeild. Ekki liggja fyrir upplýsingar um áverka þeirra.

Á fyrsta tímanum í nótt var bifreið ekið á kyrrstæða bifreið í Bústaðahverfi. Ökumaðurinn fór síðan út úr bifreið sinni og braut rúðu í íbúð í nágrenninu áður en hann settist aftur inn í bifreið sína og ók á brott. Lögreglumenn höfðu afskipti af honum skömmu síðar.

Í vesturhluta borgarinnar var maður handtekinn á þriðja tímanum fyrir hótanir, að fara ekki að fyrirmælum lögreglu og vörslu fíkniefna. Hann var vistaður í fangageymslu.

Þrír ökumenn voru handteknir í gærkvöldi og nótt grunaðir um að vera undir áhrifum fíkniefna.