Rætt hættur sem fólk leggur sig í við að fara of nálægt eldgosinu í Geldingadal á Reykjanesi, í Kastljósi í kvöld. Rögnvaldur Ólafsson, deildarstjóri hjá Almannavörnum, sagði að sú hegðun sumra að fara alveg upp á gígbarminn væri eitthvað sem hann vildi alls ekki sjá og væri stórhættulegt.

Gas rýkur úr hrauninu á gígbarminum þar sem margir hafa sést príla. Egvenía Ilynskaya jarðskjálftafræðingur sagði að hún myndi sjálf ekki þora að ganga á hrauninu sem er á gígbarminum. Þó að það sé storknað geti verið rennandi hraun undir því og hætta sé á því að reka fótinn niður í 1000 gráðu heitt hraunrennsli. Þar sem ekki renni hraun undir sé síðan hægt að skera sig hættulega á þessu hrauni.

Rögnvaldur sagði að einfaldasta leiðin til að tryggja öryggi nálægt gosinu sé einfaldlega að loka svæðinu. Vilji standi hins vegar til að halda því opnu og veita fólki aðgang að þessu náttúruundri.

Fram kom í tali Rögnvalds að verið sé að undirbúa nýja og aðgengilegri leið fyrir fólk að svæðinu, en hingað til hefur hún legið frá Bláa lóninu. Suðurstandarvegur hefur verið lokaður vegna bilunar í malbikinu en nú stendur til að opna hluta af honum aftur. Er þá hægt að aka frá Grindavík og stöðva bílana á Suðurstrandarvegi og ganga þaðan.