Þorbjörg Marinósdóttir hefur látið af störfum sem ritstjóri DV eftir árslangan feril. Tobba, eins og hún er einatt kölluð, þurfti að velja á milli ritstjórastarfsins og reksturs fjölskyldufyrirtækis hennar sem hefur vaxið hratt. Hún fór yfir málið í tölvupósti til samstarfsmanna fyrr í dag, þar sem segir meðal annars:

„Ég hef tekið þá ákvörðun að segja starfi mínu sem ritstjóri DV lausu. Ég hef starfað hjá Torgi í að verða eitt ár núna. Það ár er búið að vera ótrúlega skemmtilegt eins og þið hafið líklega heyrt á hlátursköstunum. Ritstjórnarstarfið er krefjandi starf en um leið svo gefandi og ekki síst vegna þess hve mikið af hæfileikaríku og metnaðarfullu starfsfólki starfar hjá DV og hjá Torgi öllu.

Ástæða uppsagnar minnar er að ég á lítið fyrirtæki með móður minni sem hefur vaxið á ógnarhraða og nú er svo komið að ég get ekki lengur sinnt því aðeins á kvöldin. Ég mun hella mér alfarið út í rekstur á Náttúrulega Gott og Granólabarnum sem opnar vonandi í næsta mánuði.“

Tobba mun verða við störf hjá DV áfram næstu vikurnar eða þar til nýr ritstjóri hefur tekið við.