Lögreglan óttaðist um tíma að menn tengdir Armando Bequirai, albanska manninum sem skotinn var til bana fyrir utan heimili sitt í Rauðagerði þann 13. febrúar, myndu hefna fyrir morðið á honum.
Þetta kom fram í kvöldfréttum RÚV.
Fjórir menn voru handteknir í gærmorgun í Reykjavík og á Suðurnesjum í tengslum við rannsókn málsins og tengjast þeir allir hinum látna. Margeir Sveinsson yfirlögregluþjónn segir að lögregla hafi fengið upplýsingar um að hefndarhætta gæti verið fyrir hendi og tengdist þessum fjórum mönnum. Framkvæmdar voru húsleitir í tengslum við handtökurnar og lagt hald á muni.
Lögreglan telur sig vera með morðvopnið í málinu í vörslu sinni. Margeir segir að þeir hafi talið sig vera með vopnið mestallan rannsóknartímann en rannsókn sérfræðings hafi nú staðfest þetta. Byssan sem um ræðir fannst úti í náttúrunni þar sem menn reyndu að losa sig við hana. Hún fannst ekki við húsleit.
Fjórir eru nú í gæsluvarðhaldi vegna málsins, meðal annars sá sem grunaður er um að hafa orðið Armando að bana. Hann er Albani, búsettur hér á landi, og er á milli þrítugs og fertugs. Hann neitar sök.
