Eitt innalandssmit af Covid-19 greindist í gær en sá smitaði var í sóttkví. Þrír greindust með veiruna á landamærum. Á föstudag og laugardag greindist enginn innanlands en þrjú landamærasmit.

Hjördís Guðmundsdóttir, samskiptastjóri Almannavarna, er afar ánægð með stöðuna. „Þetta lítur rosalega vel út,“ sagði hún í stuttu spjalli við DV.

En erum við þá sloppin við fjórðu bylgjuna?

„Við þurfum að bíða aðeins með að segja til um það. Það er alltaf ákveðin prósenta af þeim sem eru í sóttkví sem greinast jákvæð. En fólk er greinilega með okkur í þessu og það má alveg hrósa almenningi fyrir hvað hann hefur staðið sig vel. Ef þú hefur í huga hvernig gekk til dæmis um jólin þá er alveg greinilegt að fólk ætlar ekki að fá næstu bylgju. Það fór líka fullt af fólki í skimun að eigin frumkvæði eftir tónleikana í Hörpu á dögunum.“

Um þarsíðustu helgi greindist starfsmaður Landspítalans með breska afbrigði veirunnar. Hann hafði smitast af nágranna sínum sem bar veiruna inn í  landið. Starfsmaðurinn hafði farið á stóra tónleika í Hörpu á föstudaginn fyrir helgina. Engin smit hafa greinst hjá tónleikagestum í Hörpu umrætt kvöld, né á meðal starfsfólks og sjúklinga á Landspítalanum sem var í návígi við hinn smitaða.

Nokkur smit greindust hins vegar í kjölfarið úti í samfélaginu en síðan virðist útbreiðslan hafa stöðvast. Hjördís er sannfærð um að góð frammistaða almennings í persónulegum sóttvörnum skipti sköpum. „Fólk má alveg fá klapp á bakið fyrir hvað það er ákveðið í að standa sig. Hvergi í Evrópu eru eins lítil takmörk á því hvað maður getur gert og fólk vill ekki missa þetta frelsi,“ segir Hjördís.

Þórólfur Guðnason sóttvarnalæknir hefur skilað heilbrigðisráðherra minnisblaði með tillögum sínum um nýjar sóttvarnareglur. Ný reglugerð tekur gildi 18. mars. Ekki er vitað um innihald minnisblaðsins en ekki er búist við að sóttvarnalæknir leggi til frekari tilslakanir á samkomutakmörkunum í bili.