Kórónuveirufaraldurinn hefur tekið sinn toll á fólki en mikið af ungu fólki hefur liðið sérstaklega illa vegna samkomubanna og annarra takmarkana. Fólk á öllum aldri hefur þurft að breyta hegðun sinni vegna veirunnar og leita margir til dæmis í tölvuleiki til að hjálpa geðheilsunni. SPORTbible ræddi við ungan mann á dögunum um áhrifin sem tölvuspil hafði á líðan hans en án tölvuleiksins sem hann spilaði þá væri hann líklega ekki lifandi í dag.

Will, ungi maðurinn sem rætt var við, var 16 ára gamall árið 2019. Hann var að ganga í gegnum mikla erfiðleika en hann var til dæmis nýhættur í langtímasambandi. Geðheilsan hans fór fljótt niður á við eftir sambandsslitin en hann opnaði sig í viðtalinu um það hvernig hann náði sér aftur á strik.

„Ég var ungur og leiður, það var mikið að gera í skólanum og ég var orðinn virkilega pirraður,“ sagði Will í viðtalinu við SPORTbible. „Mér leiddist, ég var leiður og einmana. Mér leið eins og ég væri fastur og að lífið væri með mig í hálstaki. Ég var týndur, pirraður og reiður,“ segir Will sem glímdi við sjálfsvígshugsanir á þessum tíma.