Árni Þór Sigmundsson, fyrrverandi yfirmaður kynferðisbrotadeildar lögreglunnar, hristir hausinn yfir ráðningu Jóns Steinars Gunnlaugssonar í ráðgjöf varðandi endurbætur á réttarkerfinu. Verkefni Jóns snýst meðal annars um hvernig hægt sé að stytta málsmeðferðartíma. Ráðning Jóns hefur vakið harða gagnrýni vegna afstöðu hans til kynferðisbrotamála þar sem hann er sagður gera afar ríkar kröfur um sönnunarfærslu og hafa tilhneigingu til að vilja milda dóma yfir kynferðisbrotamönnum. Jón Steinar hefur andmælt slíkum staðhæfingum harðlega og segir að sér séu gerðar upp skoðanir.
Gagnrýni Árna á þessa ráðstöfum hefur þó ekkert með persónu Jóns Steinars að gera. Árni telur hins vegar að hér sé verið að finna upp hjólið, að minnsta kosti hvað varðar kynferðisbrot, það sé fyrir löngu búið að skila tillögum að endurbótum, sem þó hafi ekki verið hrundið í framkvæmd.
Árni var sjálfur í starfshópi sem skilaði ítarlegum tillögum að endurbótum í meðferð kynferðisbrotamála. Tilllögurnar má lesa hér.
Árni tjáir sig um málið í lokaðri Facebook-færslu sem hann veitti DV leyfi til að birta. Þar kemur meðal annars fram að vinna starfshópsins sem skilaði áðurnefndum tillögum hafi aðeins kostað kaffi og kex. Núna hafi dómsmálaráðherra hins vegar ráðið til verksins eftirlaunaþega fyrir töluverðar fjárhæðir. Pistillinn er eftirfarandi:
„Uppfinning hjólsins.
Á sínum tíma skipaði þáverandi dómsmálaráðherra þverfaglega nefnd til að vinna að úrbótum á rannsóknum kynferðisbrota og meðferð þeirra í rannsókn, ákæruferli og á dómstigi.
Í nefndinni sátu fulltrúar lögreglu, neyðarmóttöku LHS, ákæruvaldsins, dómsvaldsins og lögmannafélagsins auk fulltrúa dómsmálaráðuneytisins. Verkefnastjóri var María Rut Kristinsdóttir og hún stýrði vinnunni af röggsemi.
Nefndin átti marga fundi að afloknum hefðbundnum vinnudegi, uppá kaffi og kex og annar var kostnaðurinn ekki.
Afrakstur vinnunnar var greinargóð skýrsla með ýmsum úrbótum.
Skýrsluna má finna á netinu. „Um meðferð kynferðisbrota innan réttarvörslukerfisins – Tillögur um aðgerðir 2018-2022.“
Sáralítið varð um úrbætur. Bara tímasóun okkar sem unnum að þessu í von um úrbætur.
Nú hefur það hinsvegar gerst að fullorðnum og löggiltum “eftirlaunaþega” er falið að koma einum og sér með patentlausnina á þessum málum.
Legg ekkert mat á þann einstakling en velti fyrir mér hvað sé eiginlega að gerast?
Hann er allavega ekki að vinna uppá kaffi og kex. ( Átta stunda vinnudagur væri 136.000- kr )
Þetta er ekki minn höfuðverkur lengur en ég get ekki að því gert að þegar ég les svona fréttir, hristi ég hausinn og í besta falli sný mér á hina hliðina.“
