Það sauð upp úr á stefnumóti fjögurra ungmenna á Suðurnesjum eftir að önnur stúlknanna í hópnum kvartaði undan áreitni annars mannsins. Um er að ræða dómsmál sem rekið hefur verið fyrir Héraðsdómi Reykjaness undanfarið en dómur var kveðinn upp úr því í morgun. Maðurinn var ákærður fyrir líkamsárásir, kynferðislega áreitni og brot gegn barnaverndarlögum.
Mennirnir tveir höfðu boðið tveimur ungum stúlkum til sín á skemmistað. Stúlkurnar voru undir lögaldri. Mennirnir keyptu 50 skot (snafsa) og reyndu að fá stúlkurnar til að drekka sem mest. Samkvæmt framburði þeirra fyrir dómi drukku þær þó ekki mjög mikið en fundu þó vel á sér. Annar mannanna var mjög ágengur við aðra stúlkuna, káfaði á henni með ruddalegum hætti utan klæða að neðan en fór líka með höndina inn undir föt hennar að ofan og káfaði á brjóstum hennar.
Stúlkan komst við þetta í uppnám og kvartaði undan áreitninni við vinkonu sína. Þetta leiddi til harkalegra deilna stúlknanna við manninn eftir að þau voru komin út af skemmtistaðnum. Stúlkurnar segja að maðurinn hafi kallað þær ljótum nöfnum og sagst ætla að nauðga stúlkunni sem hann var að áreita. Hann tók þá stúlku síðan hálstaki og henti henni í jörðina. Leið yfir stúlkuna við árásina og mundi hún næst eftir sér þegar verið var að bera hana í hús. Þegar vinkona hennar reyndi að koma henni til varnar réðst hann einnig á hana.
Áverkar voru á báðum stúlkunum en þær leituðu til slysadeildar. Maðurinn neitaði sök en gat ekki gefið skýringar á því með hvaða öðrum hætti stúlkurnar hefðu getað fengið áverkana.
Hann var fundinn sekur um líkamsárásir og kynferðislega áreitni. Hann var hins vegar sýknaður af ákæru um brot á barnaverndarlögum þar sem talið var að aðrar lagagreinar sem hann braut hafi tæmt sök, þ.e.a.s. að það nægi að sakfella hann fyrir brot á greinum almennra hegningarlaga.
Brotin voru framin sumarið 2018 og hefur því orðið mikill dráttur á málsmeðferðinni. Þar er ekki við hinn ákærða að sakast og er þetta virt honum til refsilækkunar. Var ákvörðun um refsingu frestað og fellur hún niður ef hann heldur skilorð í tvö ár. Hann var hins vegar dæmdur til að greiða annarri stúlkunni 450 þúsund krónur í miskabætur og hinni stúlkunni 200 þúsund krónur. Hann var ennfremur dæmdur til að greiða sakarkostnað upp á rúma milljón.
