Hún er sérkennileg og skrautleg ákæran gegn manni sem réttað var yfir í Héraðsdómi Reykjavíkur í gær. Ákæran er í fjórum liðum:
Í fyrsta lagi er manninum gefið að sök að hafa stolið, í félagi við annan mann, kopar að óþekktu verðmæti á vinnusvæði VHE verktaka í Kópavogi. Þetta gerðist í október árið 2018.
Í öðru lagi er maðurinn sakaður um að hafa nokkrum dögum síðar, í félagi við annan mann, brotist inn í gám í Fossvogskirkjugarði og stolið þaðan verkfærum að óþekktu verðmæti.
Í þriðja lagi er maðurinn sakaður vopnalagabrot þann 8. mars 2019. Atvikið var við Hofsvallagötu í Vesturbæ Reykjavíkur. Lögregla fann þá við leit í bakpoka mannsins tvo hnífa, höggvopn og stunguvopn. Skömmu síðar fundust á heimili mannsins þrjú stunguvopn.
Í fjórða lagi er maðurinn sakaður um að hafa ekið þungu bifhjóli er hann var óhæfur til að stjórna því vegna fíkniefna í blóði, sem voru amfetamín og meamfetamín. Endaði ökuferðin með því að hann missti stjórn á hjólinu og var í kjölfarið handtekinn.
Maðurinn mætti ekki fyrir dóm og var dómur kveðinn upp að honum fjarstöddum. Var hann fundinn sekur um þau brot sem hann var ákærður fyrir og dæmdur í 60 daga fangelsi. Hann var sviptur ökurétti í 12 mánuði og dæmdur til að greiða 77.000 krónur í sakarkostnað.
