Kristín Jónsdóttir, hópstjóri náttúruvárvöktunar á Veðurstofu Íslands, sagði í viðtali í hádegisfréttum Bylgjunnar að það verði líklegra með hverjum deginum sem líður að það gjósi á Reykjanesskaga.
Helstu merki um þetta er sú staðreynd að kvikugangurinn sem hefur myndast milli Kelis og Fagradalsfjalls er enn að stækka og myndast. „Og það er þrýstingur að byggjast upp í þessum kvikugangi,“ sagði Kristín.
Kristín sagði jafnframt að erfitt væri að spá fyrir um hvenær eldgosið hæfist en það gæti gerst á næstu dögum.
Í samtali við DV segir Kristín að mjög erfitt sé að segja til um hve langur aðdragandi verði að gosinu. „Það gæti orðið með mjög litlum fyrirvara. Vonandi verður fyrirvari á því en í raun er ekki hægt að gefa upp neinar tölur hvað það varðar. Við búumst við að það verði dálitlar breytingar áður, það er líklegt að við greinum gosóróa þegar kvikan er komin nálægt yfirborði,“ segir Kristín og bætir því við að mælingar á SO2, eða brennisteinstvíoxíði, geti líka skipt máli varðandi það að greina hvort gos sé yfirvofandi.
„Því miður get ég ekki gefið þér betri svör varðandi þetta. Það er mjög erfitt að negla þetta niður. Líklegast er að órói mælist fyrir gos en það er ekki hægt að slá því föstu. Við höfum ekki gert þetta áður, þetta er mjög sérstakur atburður,“ segir Kristín, og á við að þær hræringar sem nú eru í gangi á Reykjanesi eigi sér ekki hliðstæðu frá því vísindamenn fóru að fylgjast almennilega með jarðhræringum hér á landi.
