Eins og greint var frá í gær þá var Jón Steinar Gunnlaugsson, lögmaður og fyrrum hæstaréttardómari, ráðinn af Áslaugu Örnu Sigurbjörnsdóttur, dómsmálaráðherra, í verkefni er varðar styttingu málsmeðferðartíma í refsivörslukerfinu.
Þessi ráðning vakti mikla reiði meðal sumra og sagði Rósa Björk Brynjólfsdóttir, þingmaður Samfylkingarinnar, að ráðningin væri köld tuska framan í almenning þar sem hún segir hann hafa tekið afstöðu í langflestum tilvika með gerendum í kynferðisafbrotamálum en ekki þolendum. Þá sé tuskan sérstaklega köld þar sem þetta var gert ljóst daginn eftir að níu íslenskar konur lögðu fram kærur til Mannréttindadómstóls Evrópu vegna málsmeðferðar íslenska réttarkerfisins þar sem þær kærðu nauðganir og önnur kynferðisafbrot en málin voru felld niður.
Jakob Bjarnar, blaðamaður Vísis, birtir færslu á Facebook-síðu sinni þar sem hann bölvar þeim sem efast um réttlætiskennd Jóns Steinars og segir hann að Jón hafi tekið skýrt fram í viðtölum að hann sé enginn vildarvinur níðinga. Sú ímynd af honum sé tilkomin vegna rangtúlkana á ummælum hans.
Bubbi Morthens skrifar ummæli við færslu Jakobs þar sem segir: „Jón Steinar er í alvöru byltingarmaður, enginn hefur barist fyrir því að dómstólar landsins séu í lagi eins og hann.“
Gunnar Smári Egilsson, formaður framkvæmdastjórnar Sósíalistaflokksins, er ekki sammála þeim Jakobi og Bubba og ritar einnig ummæli við skrif Jakobs: „JSG er grínútgáfa af Antonin Scalia, lagakarl sem vill sveigja réttarríkið að vernd fyrir auðvaldið og valdaræningja á þess vegum,“ og bætir síðan við: „Mér sýnist fólkið sem lýsir hér trausti á Jón Steinar hafi ekki lesið bækurnar sem hann hefur skrifað undanfarið. Þær eru sjálfsmiðað þvaður manns sem getur ekki horfst í augu við að hann hefur misst allt autorítet. Að sækja hann til að gera tillögur um úrbætur er algjört grín. En skaðlaust. Hann mun semja langa skýrslu um eigið ágæti og aldrei komast að neinum kjarna.“
Hér fyrir neðan má lesa færslu Jakobs í heild sinni.
https://www.facebook.com/jakob.b.gretarsson/posts/10159656145559645
