Fedor Makarov 17 ára strákur í Bretlandi vill helst ekki að útgöngubann og COVID-19 hætti þar í landi, hann hefur mokgrætt á því að verslanir hafi verið lokaðar.

Fedor sér um að redda skóm og fötum fyrir ríka og fræga knattspyrnumenn í Bretlandi. Á tímum COVID-19 hefur aldrei verið meira að gera hjá honum.

Hann rekur fyrirtækið Fedor Sneaks sem reddar skóm og fötum sem oft er eriftt að komast yfir, viðskiptavinir hans eru fyrst og síðast ríkir og frægir knattspyrnumenn Í Bretlandi.

Emile Smith Rowe hjá Arsenal, Mason Greenwood hjá Manchester United og fleiri leikmenn hafa notað þjónustu hans.

„Ég vil ekki að útgöngubannið taki enda, ef ég er heiðarlegur,“ sagði Fedor í samtali við enska götublaðið The Sun.

Christian Dior skór á 200 þúsund krónur eða föt sem kosta hálfan handlegg er eitt af því sem Fedor reddar hratt og örugglega. „Það hefur aldrei verið meira að gera, ég hélt að knattspyrnumenn myndu hætta versla skó og föt í útgöngubanninu.“

„Það eru hins vegar dagar sem ég næ ekki að senda allt út sem þarf,“ sagði Fedor en hann hefur frá 12 ára aldri verið að kaupa eftirsótta skó og selja þá dýrum dómi.