Í morgun var stór hópur af nemendum í 5. bekk í Reykjavík stödd á Litla sviði Borgarleikhússins að horfa á sýninguna Stúlkan sem stöðvaði heiminn. Í miðri leiksýningu kom jarðskjálfti sem fór ekki fram hjá neinum á höfuðborgarsvæðinu, leikurum og starfsfólki sýningarinnar var eðlilega brugðið. Börnin í salnum voru öll handviss um að þetta væri partur af sýningunni enda fjallar sýningin um stúlku sem getur stjórnað óveðri og gengur á ýmsu í sýningunni.

Stúlkan sem stöðvaði heiminn er leiksýning sem frumsýnd var 20. febrúar og er samstarfsverkefni milli Leikhópsins 10 fingur og Borgarleikhússins. Með stuðningi frá List fyrir alla var hún valin sem boðssýning fyrir alla nemendur í 5. bekk í Reykjavík.  Óhætt er að segja að mikil gleði hefur verið meðal krakkana að koma í leikhúsið enda langt síðan flestir hafa farið í leikhús. Svo mikil var gleðin að nokkrir jarðskjálftar slógu þau ekki út af laginu.