Um klukkan 22 í gærkvöldi var par handtekið í Lauganeshverfi en það er grunað um vörslu/sölu fíkniefna. Að lokinni dvöl í fangageymslu og yfirheyrslum var parið látið laust.  Um miðnætti var maður handtekinn í Árbæ en hann er grunaður um líkamsárás og brot á vopnalögum. Áverkar árásarþolans eru minniháttar að því er segir í dagbók lögreglunnar.

Um klukkan tvö í nótt ökumaður handtekinn, grunaður um að vera undir áhrifum fíkniefna. Farþegi í bifreiðinni er grunaður um brot á vopnalögum. Báðir eru ólögráða en ekki náðist samband við foreldra þeirra. Þeim var ekið heim að rannsókn lokinni og barnaverndaryfirvöldum tilkynnt um málið.

Á tólfta tímanum kom eldur upp í atvinnuhúsnæði í Grafarholti. Húsið var mannlaust. Slökkvilið fór á vettvang en um minniháttar eldsvoða var að ræða.

Tveir ökumenn voru handteknir í gærkvöldi, grunaðir um að vera undir áhrifum fíkniefna. Annar þeirra reyndist einnig vera sviptur ökuréttindum og var þetta ekki í fyrsta sinn sem hann er staðinn að akstri eftir að hann var sviptur þeim.