Papa Bouba Diop, fyrrverandi leikmaður liða á borð við Portsmouth, Fulham og West Ham United, er látin, 42 ára að aldri eftir langvinn veikindi. Greint var frá andláti hans í gær.

Diop á að baki 129 leiki í ensku úrvalsdeildinni, hann skoraði 8 mörk í þeim leikjum og gaf 5 stoðsendingar.

Bestu ár Bouba Diop á Englandi voru hjá Fulham en þar lék hann frá 2004 til 2007. Heiðar Helguson lék með þessum öfluga miðjumanni hjá Fulham þar sem þeir áttu góðu gengi að fagna.

Heiðar minnist félaga síns í færslu á Faceobok. „Papa Bouba hefur kvatt okkur. Þvílik synd. Algjör snillingur og ljúfasta manneskja sem eg hef kynnst. Hans verður pottþétt saknað sárt af mörgum,“ skrifar þessi fyrrum íslenski landsliðsmaður á Faceobok og birtir mynd af þeim að fagna í búningi Fulham.

Diop var einna þekktastur fyrir sigurmarkið sem hann skoraði fyrir landslið Senegal í opnunarleik Heimsmeistaramótsins 2002. Þar vann Senegal óvæntan sigur á ríkjandi heimsmeisturum Frakka. Þetta var fyrsti leikur Senegal á Heimsmeistaramóti og fyrsta mark þeirra á slíku móti.

Senegal komst í 8-liða úrslit mótsins eftir að hafa unnið Frakkland og gert jafntefli við Danmörk og Úrúgvæ. Í 16-liða úrslitum vann liðið Svíþjóð í framlengingu og spilaði við Tyrkland í 8-liða úrslitum þar sem þeir töpuðu í framlengdum leik.

Alls lék Diop 63 landsleiki fyrir Senegal og skoraði í þeim 11 mörk.