Phil Foden fær sitt fyrsta stóra tækifæri með enska landsliðinu á nýjan leik í kvöld þegar liðið tekur á móti Íslandi Í Þjóðadeildinni.

Foden var rekinn heim úr enska landsliðinu eftir síðasta leik við Ísland þar sem hann braut sóttvarnarreglur með Mason Greenwood. Þeir félagar fengu tvær íslenskar stúlkur á hótel sitt, eitthvað sem er bannað á tímum COVID-19.

Mason Greenwood hefur ekki fengið tækifærið á nýjan leik eftir heimskupörin í Reykjavík. „Það hefur verið gott að hafa Foden aftur, ég ræddi við hann á fyrsta degi og þetta mál er úr sögunni,“ sagði Gareth Southgate.

Talið er að Foden verði í byrjunarliðinu í kvöld og spili þar sinn þriðja landsleik fyrir England.

Leikurinn í kvöld hefur enga þýðingu fyrir bæði lið, England getur ekki komist upp úr riðlinum og Ísland er fallið úr A-deildinni.

Líklegt byrjunarlið Englands, 3-4-3: Pickford; Walker, Maguire, Mings; Trippier, Rice, Mount, Saka; Grealish, Kane, Foden.